牡丹亭
《牡丹亭還魂記》，簡稱《還魂夢》或者《牡丹亭》，係劇作家湯顯祖喺明朝萬曆四十五年（公元1617年）根據明朝話本小說《杜麗娘慕色還魂》創作既劇本，講既係一名千金小姐杜麗娘同窮書生柳夢梅既愛情故事[1][2]。
故事情節[編輯]
杜麗娘喺夢裏面邂逅書生柳夢梅之後傾心相愛，萬分思念之下，鬱鬱寡歡，最後竟然傷心到死咗。死咗之後，佢老豆杜寶喺去淮陽升官做安撫使之前，將杜麗娘埋葬喺後花園既一棵梅樹下面，然後修建咗一座梅花庵。杜麗娘既靈魂繼續揾佢既夢中情人，冇幾耐書生柳夢梅上京考試，路過住咗喺梅花庵。喺梅花庵，柳夢梅遇見杜麗娘既遊魂，然後發展咗人鬼戀。杜麗娘既靈魂嚟到地府，判官查過生死冊之後，發現佢命不該絕，而且命中注定有一段姻緣，所以就放佢返人間。而柳夢梅喺殿試度考中咗狀元。最終幾經波節之後，杜麗娘同柳夢梅有情人終成眷屬，終於可以結婚[3]。
四大古典戲劇[編輯]
《牡丹亭》同埋《西廂記》《長生殿》再加上《竇娥冤》（或者《桃花扇》）一齊俾人叫做中國四大古典戲劇[4][5]。
主要角色[編輯]
杜麗娘[編輯]
杜麗娘係《牡丹亭》裏面嘅女主角。杜麗娘係官家大小姐，嘅聰明、嫻靜，又美麗、動人。湯顯祖通過夢境同埋幽冥兩種奇幻嘅意象，亦都打破咗男女性別角色同埋情慾嘅社會規範，描繪咗杜麗娘。佢追求心中嘅愛情生活，喺夢裏面同書生柳夢梅熱戀，因為掛住夢中情人，思念成疾，仲死埋，俾佢老豆埋葬咗喺梅花樹下，起咗間梅花庵。後來柳夢梅真係去咗梅花庵，杜麗娘鼓勵柳夢梅進京考試，柳夢梅考中狀元，杜麗娘亦都復活咗，最終實現咗佢嘅愛情願望。
容貌[編輯]
杜麗娘係一個難得一見嘅絕世美女。係杜麗娘梳妝，準備遊園嘅時候，侍女春香睇見杜麗娘打扮後嘅美貌，講咗：「今日穿插得好」，然後杜麗娘唱：「你道翠生生出落的裙衫兒茜，艷晶晶花簪八寶鎮 ，可知我常一生兒愛好是天然，恰三春好處無人見。不提防沉魚落燕鳥驚喧，則怕的羞花閉月花愁顫。」[6]
性格[編輯]
王思仁係第一個點評《牡丹亭》嘅人，佢嘅評語係：「杜麗娘之妖也，柳夢梅之癡也，老夫人之軟也，杜安撫之古執也，陳最良之霧也，春香之牢賊也，無不從筋節竅髓，以探其七情生動之微也」[7]。 王思仁將杜麗娘嘅形象概括做「妖」，原因係杜麗娘做咗佢嗰個年代好多人都唔敢做嘅嘢，佢好勇敢咁去追求愛情、可以為佢追求嘅嘢付出生命做代價，即使同當時嘅社會制度對抗，仍然努力抗爭。而在《圓駕》嗰節，杜麗娘在皇帝面前據理力爭，更加顯現咗佢對自信、堅決，「妖」中有佢老豆杜安撫嘅故執。
喺《牡丹亭》裏面，杜麗娘對「情」嘅感覺係有不斷成長嘅，從《閨塾》到《圓駕》，由最初嘅壓抑、羞澀，到夢裏面嘅身心徹底解放，然後復活咗之後，馬上又再矜持起來，原因就好似杜麗娘喺《婚走》所講：「前夕鬼也，今日人也。鬼可虛情，人須實禮。」喺虛幻嘅世界，喺夢境裏面，佢可以放任自己、身心自由、真情流露，可以為情而「妖」；而人總要面對現實世界，所以喺現實世界，佢係知書識禮、老成持重、甘於接受道德倫理嘅束縛[8]。
形象[編輯]
杜麗娘嘅「還魂」故事本身，其實喺傳統戲曲裏面唔係一個新嘅概念。但係同傳統戲曲裏面嘅「還魂」唔同，湯顯祖對杜麗娘形象嘅刻畫可以話係入木三分，深得人心，勾起咗明清期間唔少女仔嘅共鳴，所以個故事喺當時好受女仔歡迎，好多當時嘅女仔對杜麗娘嘅遭遇都好同情，亦都好有代入感。就好似明朝嘅馮小青講嘅：「冷雨幽窗不可聽，挑燈閒看牡丹亭。人間亦有癡於我，豈獨傷心是小青！」
明朝同埋清朝，《牡丹亭》都係閨閣禁書，喺《紅樓夢》嘅第二十三回（西廂記妙詞通戲語，牡丹亭艷曲警芳心）裏面講，林黛玉想去見賈寶玉，走到梨香院嘅牆角嘅時候，賈府戲班嘅十二個女仔喺度練習唱戲，林黛玉聽到佢哋唱《牡丹亭》嘅《驚夢》嗰段：「原來奼紫嫣紅開遍，似這般都付與斷井頹垣。良辰美景奈何天，賞心樂事誰家院。」就自歎，心想：「原來戲上也有好文章。可惜世人只知看戲，未必能領略這其中的趣味」、「則為你如花美眷，似水流年……」、「你在幽閨自憐」，佢嘅感覺係心動神搖、如醉如痴、站立不住[9]。
杜麗娘嘅形象重點唔係佢嘅「死而復生」後嘅經歷，而係佢「因夢而亡」嘅體驗，呢點喺傳統戲曲好少見。而呢種「因夢而亡」嘅體驗係由一場「春夢」開始，蕩起咗杜麗娘嘅無限春心，呢種人類本能嘅情慾衝動、生理慾望嘅探討，一直係歷朝歷代嘅戲曲故事講得比較隱晦嘅。[10]
柳夢梅[編輯]
柳夢梅係《牡丹亭》嘅男主角，佢係一個典型嘅書生，喺《牡丹亭》個古仔裏面，佢同女主角，大家閨秀嘅杜麗娘，喺夢裏面相識、邂逅。醒咗之後，杜麗娘因為思念夢中情郎，而鬱鬱寡歡，最後仲死咗。杜麗娘嘅老豆杜寶，去淮陽升任安撫使之前，將杜麗娘葬喺後花園嘅梅樹下面，又修咗一座梅花庵，請咗個道姑管理。佢兩個再見嘅時候，已經係人鬼殊途，佢哋嘅愛情故事感動咗閻羅王，佢俾杜麗娘還魂翻生。
意象[編輯]
柳夢梅個名，「柳」、「夢」、「梅」三個字都有意思，係一種意象組合。
「柳」喺中國歷史概念裏面離別嘅象徵，就好似《詩經》嘅《採薇》講到：「昔我往矣，楊柳依依」。而柳枝亦都可以話係《驚夢》呢節裏面，柳夢梅俾杜麗娘嘅愛情信物。佢哋戀愛係由柳夢梅講： 「恰好花園內，折取垂柳半枝。姐姐，你嘅淹通書史，可作詩以賞此柳枝乎？」開始嘅。[11]
夢可以令人忘卻自身嘅實現環境，放心咁去享受快樂。正如李後主（李煜）嘅《浪淘沙令·簾外雨潺潺》裏面講：「夢裡不知身是客，一晌貪歡」。
而夢可以話係《牡丹亭》整個故事嘅主線，呢個夢令到原本無可以相遇嘅男女主角可以相遇，互相愛慕。呢個夢亦都令到男女主角可以突破現實同埋禮教嘅束縛，大膽咁追求內心嘅真實情感，發展出愛情。好似《詩經．齊風．雞鳴》所講咁：「甘與子同夢」[12]。
梅花係喺嚴寒嘅冬天即將要過去，春天快到嘅時候，最先開花嘅植物，所以梅有春天嘅像徵。而杜麗娘喺梅樹下面等待柳夢梅，亦象徵咗一段春情嘅開始。就好似《驚夢》裏面，杜麗娘講嘅：「曉來望斷梅關，宿妝殘」。
喺古代，「梅」字其實有「媒」嘅意思，例如《詩經．國風．召南．摽有梅》呢首詩嘅「梅」，係比喻及時婚姻[13]。
參考[編輯]
- ↑ YUAN, Jiaxin (2023-01-01). 〈《牡丹亭》愛情觀和至情觀再探〉. Dissertations from all years.
- ↑ 〈中国演劇史上の京劇〉 (PDF).
{{cite web}}: CS1 maint: url-status (link) - ↑ 〈牡丹亭 - 维基文库，自由的图书馆〉. zh.wikisource.org (簡體中文). 喺2023-12-03搵到.
- ↑ 〈政治詮釋與情欲轉移: 論晚清至 1940 年代《 牡丹亭》 的接受情況〉 (PDF). 原著 (PDF)喺2023年11月21號歸檔. 喺2023年11月21號搵到.
- ↑ 曾永義 (1991). 《中國古典戲劇的認識與欣賞》 (中文). 正中書局．流傳文化．墨文堂文化. ISBN 978-957-09-0367-6.
- ↑ 〈牡丹亭/惊梦 - 维基文库，自由的图书馆〉. zh.wikisource.org (簡體中文). 喺2023-12-03搵到.
- ↑ 季曉燕 (2006–12). 〈論《牡丹亭》人物衆生相〉. 《동아인문학》 (韓文). 10: 171–204. ISSN 1598-6888.
{{cite journal}}: CS1 maint: date format (link) - ↑ 〈牡丹亭/婚走 - 维基文库，自由的图书馆〉. zh.wikisource.org (簡體中文). 喺2023-12-03搵到.
- ↑ 〈紅樓夢/第023回 - 維基文庫，自由的圖書館〉. zh.wikisource.org (繁體中文). 喺2023-12-03搵到.
- ↑ 〈杜麗娘形象的心理解讀——「情慾」與「道德」的情感矛盾__臺灣博碩士論文知識加值系統〉. ndltd.ncl.edu.tw. 喺2023-12-03搵到.
- ↑ 〈牡丹亭/惊梦 - 维基文库，自由的图书馆〉. zh.wikisource.org (簡體中文). 喺2023-12-03搵到.
- ↑ 〈诗经/鸡鸣 - 维基文库，自由的图书馆〉. zh.wikisource.org (簡體中文). 喺2023-12-03搵到.
- ↑ 〈詩經/摽有梅 - 維基文庫，自由的圖書館〉. zh.wikisource.org (繁體中文). 喺2023-12-03搵到.